१०५ पाठक संख्या
काठमान्डौ। अमेरिकाको आइडाहो राज्यस्थित माउन्टेन होम वायुसेना केन्द्रमा आयोजित हवाई प्रदर्शन (एयर शो) का क्रममा दुईवटा सैन्य विमान आपसमा ठोक्किएका छन्। आइतबार भएको यस दुर्घटनामा विमानमा सवार चारै जना चालक (पाइलट) प्यारासुटमार्फत सुरक्षित रूपमा बाहिर निस्कन सफल भएका छन्।
अमेरिकी नौसेनाका अनुसार वासिङ्टन राज्यको व्हिड्बी टापुस्थित इलेक्ट्रोनिक आक्रमण स्क्वाड्रनसँग सम्बन्धित दुई अत्याधुनिक युद्धक विमानहरू प्रदर्शनका क्रममा आकाशमै ठोक्किएका थिए। दुर्घटनालगत्तै वायुसेना केन्द्रलाई तत्काल बन्द गरी बाँकी सम्पूर्ण कार्यक्रमहरू रद्द गरिएको थियो।
सामाजिक सञ्जालमा सार्वजनिक भएका भिडियोहरूमा विमानहरू ठोक्किएलगत्तै चारवटा प्यारासुट खुलेको र विमानहरू जमिनमा खसेर ठूलो आगोको गोलासहित विस्फोट भएको देखिन्छ। दुर्घटनामा संलग्न विमानहरू अत्याधुनिक इलेक्ट्रोनिक युद्ध प्रणालीयुक्त विशेष सैन्य विमान हुन्।
अधिकारीहरूका अनुसार उद्धार गरिएका चारै जना चालकको अवस्था स्थिर रहेको छ र घटनामा अन्य कुनै मानवीय क्षति भएको छैन। हवाई प्रदर्शन आयोजनामा सहयोग पुर्याएको संस्था ‘सिल्भर विङ्स अफ आइडाहो’ की विपणन निर्देशक किम साइक्स र प्रत्यक्षदर्शी शेन ओग्डेनले चालकहरू सुरक्षित रहेकोमा राहत व्यक्त गरेका छन्।
अमेरिकी नौसेनाले घटनाको कारणबारे विस्तृत छानबिन सुरु गरिसकेको जनाएको छ।
