१२१ पाठक संख्या
काठमाण्डौ। नेकपा (एमाले) को सचिवालय बैठक आगामी शनिबार बस्ने भएको छ । हालै सम्पन्न निर्वाचनपछि पहिलो पटक पार्टी अध्यक्ष केपी शर्मा ओलीको प्रत्यक्ष नेतृत्वमा यो बैठक बस्न लागेको हो । पार्टीका एक पदाधिकारीका अनुसार बैठकको आवश्यक एजेन्डाहरू तय गर्ने कार्य भइरहेको छ ।
निर्वाचनपछिको समीक्षा र पार्टीका आगामी रणनीतिबारे छलफल गर्न एमालेको औपचारिक बैठक बस्न ढिलाइ भइरहेको अवस्थामा यो बैठकलाई महत्त्वका साथ हेरिएको छ । यसबीचमा अध्यक्ष ओली विभिन्न व्यक्तिगत र स्वास्थ्यजन्य कारणले पार्टीका औपचारिक गतिविधिमा प्रत्यक्ष सहभागी हुन सक्नुभएको थिएन । बुवाको निधनपछि शोकमा रहनुभएका ओली त्यसलगत्तै पक्राउ र पित्तथैलीको शल्यक्रियापछि चिकित्सकको सल्लाहअनुसार आराम गरिरहनुभएको थियो ।
यद्यपि, उहाँले भक्तपुरको गुण्डुस्थित आफ्नै निवासबाटै पार्टीका आन्तरिक गतिविधिहरूमा भने चासो र समन्वय राखिरहनुभएको थियो । अध्यक्ष ओलीको अनुपस्थितिमा पार्टीको कार्यवाहक जिम्मेवारी उपाध्यक्ष रामबहादुर थापा ‘बादल’ ले सम्हाल्दै आउनुभएको थियो ।
पार्टीका औपचारिक बैठकहरू नबस्दा सांगठनिक कार्यमा प्रभाव परेको भन्दै गत २५ वैशाखमा उपाध्यक्ष विष्णुप्रसाद पौडेल र महासचिव शंकर पोखरेलले गुण्डु पुगेर अध्यक्ष ओलीसँग विशेष भेटवार्ता गर्नुभएको थियो । सोही भेटमा भएको छलफल र सहमतिका आधारमा शनिबारका लागि सचिवालय बैठक आह्वान गरिएको हो । शनिबारको बैठकमा चुनावको समीक्षा, पार्टीको आगामी कार्यदिशा र समसामयिक राजनीतिक विषयमा गहन छलफल हुने बुझिएको छ ।
