१५४ पाठक संख्या
कुवेत सिटी: कुवेतको ट्राफिक महानिर्देशनालयले ‘एकीकृत खाडी ट्राफिक सप्ताह’ को अवसरमा “सुरक्षित रूपमा बाटो काटौं” भन्ने नाराका साथ जथाभावी बाटो काट्दा हुने गम्भीर जोखिमबारे चेतावनी जारी गरेको छ।
विभागले विज्ञप्ति जारी गर्दै तोकिएको स्थानभन्दा अन्यत्रबाट बाटो काट्नु पैदल यात्री र सवारी चालक दुवैको ज्यान जोखिममा पार्ने कार्य भएको र यो कानुनी रूपमा दण्डनीय हुने स्पष्ट पारेको छ।
नियम अनुसार, गलत ढंगले बाटो काट्दै गरेको अवस्थामा समातिएमा पैदल यात्रीले २० कुवेती दिनार मेलमिलाप जरिवाना (reconciliation fine) तिर्नुपर्ने हुन्छ। यदि कसैले उक्त जरिवाना तिर्न अस्वीकार गरेर मामला अदालतसम्म पुगेमा, जरिवानाको रकम बढेर ४५ देखि ७५ कुवेती दिनारसम्म पुग्न सक्ने चेतावनी दिइएको छ।
ट्राफिक विभागले बाटो काट्दा मोबाइल फोन जस्ता ध्यान भड्काउने वस्तुहरूको प्रयोग नगर्न, ट्राफिक संकेतहरूको पालना गर्न, सवारी साधन पूर्ण रूपमा रोकिएको सुनिश्चित गर्न र बाटो काट्नु अघि दुवै तर्फ राम्ररी हेर्न सार्वजनिक आग्रह गरेको छ। सबै सडक प्रयोगकर्ताहरूको सुरक्षा बढाउन निर्धारित पैदल यात्री क्रसिङहरू मात्र प्रयोग गर्न समेत विशेष जोड दिइएको छ।
