९७ पाठक संख्या
काठमान्डौ। इरानले विश्वकै महत्वपूर्ण समुद्री व्यापारिक मार्ग होर्मुज जलडमरूमध्यमा आफ्नो सुरक्षा निगरानीलाई थप सशक्त बनाएको छ। इरानी सेनाका प्रवक्ता मोहम्मद अक्रमिनियाले शनिबार एक विशेष जानकारी दिँदै उक्त क्षेत्रमा हुने जहाजहरूको आवागमन अब इरानी निकायहरूको प्रत्यक्ष समन्वय र पूर्व स्वीकृतिमा मात्र आधारित हुने स्पष्ट पारेका छन्। होर्मुज जलडमरूमध्यको व्यवस्थापन र सुरक्षा इरानको सार्वभौम अधिकार क्षेत्रभित्र पर्ने उल्लेख गर्दै उनले वर्तमान क्षेत्रीय परिस्थितिलाई मध्यनजर गरी थप सुरक्षा उपायहरू अपनाइएको बताए। यस कार्यका लागि इरानको इस्लामिक रिभोलुसन गार्ड कोप्र्स (आइआरजीसी) र राष्ट्रिय सेनाले संयुक्त रूपमा गस्ती तथा निगरानी गरिरहेका छन्।
यसैबीच, इरानका उपविदेशमन्त्री हमिद घानबारीले विभिन्न राष्ट्रहरूले आफ्ना व्यापारिक जहाजहरूको सुरक्षित आवागमन सुनिश्चित गर्न इरानसँग कूटनीतिक च्यानलमार्फत संवाद गरिरहेको जानकारी दिएका छन्। इरानले गत फेब्रुअरी २८ देखि नै केही विशेष रणनीतिक कारणले यस क्षेत्रमा सुरक्षा सतर्कता बढाएको हो। विश्वव्यापी ऊर्जा आपूर्तिका लागि ‘लाइफलाइन’ मानिने यो जलमार्गमा इरानले चालेको पछिल्लो कदमलाई अन्तर्राष्ट्रिय समुदायले निकै चासोका साथ हेरिरहेको छ। जलडमरूमध्यमा सुरक्षा कडा पारिएसँगै अब अन्तर्राष्ट्रिय जहाजहरूले उक्त मार्ग प्रयोग गर्दा इरानी सुरक्षा मापदण्ड र समन्वयलाई अनिवार्य पालना गर्नुपर्ने देखिएको छ।
