११७ पाठक संख्या
सल्यान, १९ वैशाख । जिल्ला प्रहरी कार्यालय सल्यानको नयाँ भवन निर्माणका लागि जग खन्ने क्रममा ठूलो परिमाणमा पुराना बम र विस्फोटक पदार्थ फेला परेका छन्। शारदा नगरपालिका–३ स्थित कार्यालय परिसरमा भवनको घडेरी खन्ने क्रममा ८६ थान बम र अन्य युद्धकालीन सामग्रीहरू फेला परेका हुन्।
जिल्ला प्रहरी कार्यालय सल्यानका प्रमुख प्रहरी नायब उपरीक्षक (DSP) डा. हेमबहादुर केसीका अनुसार उत्खननका क्रममा ८२ वटा सकेट बम, तीन वटा सुतली बम र एउटा बोतल बम फेला परेको छ। सुरुमा जग खन्दा शंकास्पद वस्तु देखिएपछि तत्काल सुरक्षा सतर्कता अपनाउँदै उत्खनन कार्य अघि बढाइएको थियो।
नेपाल प्रहरी र नेपाली सेनाको संयुक्त टोलीले गरेको विस्तृत उत्खननका क्रममा बमका अतिरिक्त सात थान रेडियो वेभ उपकरण, करिब ५०० ग्राम विस्फोटक पदार्थ (बारुद), बम बनाउन प्रयोग गरिने दुई किलो कच्चा सामग्री र १० मिटर फायरिङ केबल समेत बरामद गरिएको छ। फेला परेका यी सामग्रीहरू द्वन्द्वकालमा लुकाएर राखिएको हुनसक्ने अनुमान गरिएको छ। अहिले उक्त क्षेत्रलाई सुरक्षित राख्दै थप अनुसन्धान र व्यवस्थापनको प्रक्रिया अगाडि बढाइएको प्रहरीले जनाएको छ।
