१५६ पाठक संख्या
काठमान्डौ। चितवनस्थित बीपी कोइराला मेमोरियल क्यान्सर अस्पतालको रिक्त अध्यक्ष पदका लागि पहिलोपटक खुला आवेदनमार्फत नियुक्ति प्रक्रिया अगाडि बढाइएको छ। स्वास्थ्य तथा जनसंख्या मन्त्रालयले मंगलबार एक सूचना जारी गर्दै योग्यता पुगेका इच्छुक विशेषज्ञ चिकित्सकहरूलाई सात दिनभित्र आवेदन दिन आह्वान गरेको हो। अस्पतालको इतिहासमा खुला प्रतिस्पर्धाका आधारमा अध्यक्ष चयन गर्न लागिएको यो पहिलो अवसर हो।
अस्पताल ऐन, २०५३ को प्रावधानअनुसार अध्यक्ष पदका लागि विशिष्ट शैक्षिक र व्यावसायिक योग्यता तोकिएको छ। मन्त्रालयका अनुसार मान्यता प्राप्त शिक्षण संस्थाबाट चिकित्साशास्त्रमा स्नातकोत्तर (MD/MS) उपाधि हासिल गरी क्यान्सर रोगको क्षेत्रमा कम्तीमा १५ वर्ष काम गरेको वा स्वास्थ्य क्षेत्रमा कम्तीमा २० वर्षको अनुभव भएको वरिष्ठ चिकित्सकहरू यस पदका लागि योग्य मानिनेछन्। सरकारी निर्णयअनुसार नियुक्त हुने अध्यक्षको कार्यकाल तीन वर्षको रहनेछ।
यसअघि २० चैत २०७९ मा नियुक्त हुनुभएका डा. विजयराज न्यौपानेको तीनवर्षे कार्यकाल समाप्त भएपछि यो पद रिक्त भएको थियो। विगतमा राजनीतिक नियुक्ति वा सोझै सरकारद्वारा मनोनयन गरिने प्रचलन रहे पनि यसपटक पारदर्शी छनोट प्रक्रिया अपनाउन खोजिएको मन्त्रालयको सूचनाबाट देखिन्छ। यस प्रक्रियाले अस्पतालको नेतृत्वमा योग्य र अनुभवी विशेषज्ञ पुग्ने विश्वास गरिएको छ।
