१६८ पाठक संख्या
काठमाडौँ । लामो समयदेखि जारी गतिरोध र क्षेत्रीय तनावलाई कम गर्ने उद्देश्यका साथ इरान र अमेरिकाका प्रतिनिधिहरू पुनः वार्ताको टेबुलमा बस्ने भएका छन्। इरानी अधिकारीहरूका अनुसार आगामी सोमबार पाकिस्तानको राजधानी इस्लामाबादमा दुई देशका वार्ताकारहरूबीच महत्वपूर्ण भेटघाट हुने तय भएको छ।
यस वार्तामा सहभागी हुन दुवै देशका उच्चस्तरीय टोलीहरू आइतबार नै इस्लामाबाद पुग्ने अपेक्षा गरिएको छ। सीएनएनका अनुसार यसअघिका विभिन्न चरणका वार्ताहरूमा कुनै ठोस सहमति हुन नसके पनि यसपटकको भेटघाटलाई निकै अर्थपूर्ण रूपमा हेरिएको छ। विशेषगरी मध्यपूर्वको सुरक्षा चुनौती र रणनीतिक विषयहरूमा यो वार्ता केन्द्रित रहने बुझिएको छ।
दक्षिण एसियाली मुलुक पाकिस्तानले यी दुई शक्ति राष्ट्रहरूबीच मध्यस्थकर्ताको भूमिका निर्वाह गर्दै आएको छ। सोमबारको बैठकका लागि इस्लामाबादमा सुरक्षा व्यवस्था अत्यन्तै कडा पारिएको छ। अन्तर्राष्ट्रिय समुदायले यस वार्ताको नतिजालाई निकै चासोका साथ पर्खिरहेका छन्।
वार्ताका ठोस एजेन्डाहरूलाई दुवै पक्षले हालसम्म गोप्य नै राखेका छन्। यद्यपि, आइतबार हुने वार्ताकारहरूको आगमनले सोमबारको औपचारिक संवादका लागि सकारात्मक वातावरण तयार गर्ने अधिकारीहरूको विश्वास छ। यस वार्ताले मध्यपूर्वमा जारी तनाव कम गर्न मद्दत पुर्याउने अपेक्षा गरिएको छ।
