नेपाल क्रिकेट: आईसीसीले साढे तीन वर्षपछि यसकारण गर्‍यो क्यानलाई लगाएको प्रतिबन्ध फुकुवा

असोज २८।
साढे तीन वर्षअघि निलम्बनमा परेको नेपाल क्रिकेट सङ्घ (क्यान) ले पुन: अन्तर्राष्ट्रिय क्रिकेट सङ्घ आईसीसीको सदस्यता पाएको छ।

सोमवार दुबईमा बसेको अन्तर्राष्ट्रिय क्रिकेट परिषद् (आईसीसी)को बोर्ड बैठकले नेपाललाई लगाएको प्रतिबन्ध फुकुवा गरेको हो।

नेपाली क्रिकेटको नेतृत्व तहमा विवाद सिर्जना भएपछि सन् २०१६ मा आईसीसीले क्यानको सदस्यता निलम्बन गरेको थियो।

त्यतिखेर विश्व क्रिकेटको सर्वोच्च निकायले नेपाल क्रिकेट सङ्घमा सरकारी हस्तक्षेप र आर्थिक अनियमितता भएकाले त्यस्तो कदम लिइएको जनाएको थियो। क्यानको विवाद अदालतमा पनि पुगेको थियो।

आईसीसीले नेपाल र जिम्बाब्वेलाई फेरि आफ्नो सदस्यता दिएको हो।

केही हप्ताअघि भएको निर्वाचनमा चतुरबहादुर चन्द क्यानको नयाँ अध्यक्ष चुनिएका थिए।

निर्वाचनले खोलेको बाटो
गत महिना आईसीसीले बनाएको स्वतन्त्र समितिले राष्ट्रिय खेलकुद परिषद्‌को रोहबरमा क्यानको निर्वाचन गरेको थियो।

उक्त निर्वाचन पर्यवेक्षण गर्न आईसीसीका प्रतिनिधि काठमाण्डू आएका थिए।

त्यससँगै निलम्बन फुकुवा हुने सङ्केत पाइएको राष्ट्रिय खेलकुद परिषद्का सदस्यसचिव रमेश सिलवालले यसअघि बीबीसीलाई बताएका थिए।

आईसीसीको नयाँ मार्गचित्रअनुसार अनुसार जिल्ला क्रिकेट सङ्घ, प्रदेश समितित तथा केन्द्रीय समितिको नयाँ ढङ्गबाट निर्वाचन भएका थिए।

ती निर्वाचन गर्नका निम्ति गठित पाँचसदस्यीय स्वतन्त्र समितिमा आईसीसीको तर्फबाट तीन सदस्य राखिएका थिए भने बाँकी एक-एक राखेप र क्यानका तर्फबाट थिए।

प्रतिबन्ध
तीन वर्षअघि प्रतिबन्ध लगाउँदा क्यानले जारी गरेको विज्ञप्तिमा भनिएको थियो, “क्यान नेतृत्वबारे राखेपले गठन गरेको तदर्थ समिति र त्यसलाई चुनौती दिनेगरी अदालतमा परेको मुद्दाले नेपालको क्रिकेट नेतृत्वमा शून्यता सिर्जना गरेको छ। त्यसले आईसीसी प्रावधानको उल्लङ्घन गरेकाले प्रतिबन्ध लगाइएको छ।”

आईसीसीले त्यति खेर क्यान सरकारी हस्तक्षेपबाट मुक्त नभएसम्म प्रतिबन्ध कायम राखिने बताएको थियो।

क्यानको भनाइ थियो: “नेपालमा रहेका क्रिकेटका प्रतिभा र अवसर छान्न सक्नेगरी क्यानको सङ्गठन बन्न आवश्यक छ।”

प्रतिबन्धले क्यानलाई आईसीसीले दिने आर्थिक सहयोग कटौती गरिए पनि नेपाललाई अन्तर्राष्ट्रिय खेलमा सहभागी हुन दिइएको थियो।

‘ससर्त’ फुकुवा

आईसीसीले हालै निर्वाचित क्यानको समितिलाई मान्यता दिँदै नेपालका लागि पूर्ण रूपबाट यस सङ्कटबाट निस्कन ‘सङ्क्रमणकालिन योजना’ विकास गरिने जनाएको छ।

आईसीसीले जारी गरेको प्रेस विज्ञप्तिमा अध्यक्ष शशाङ्क मनोहरले भनेका छन्: “उक्त योजनामा असोसिएट सदस्यको मापदण्डसँग मेल खानेगरी सहायता प्रदान गरिनेछ जसमा नियन्त्रित रूपमा केही आर्थिक सहयोग पनि गरिनेछ।”

त्यति बेलासम्मका लागि आईसीसीले यो फुकुवालाई ससर्त भनेको छ।

जिम्बाव्वे पनि तीन महिना निलम्बनमा परेको थियो।
BBC NEPALI






Related Posts
  • तमु समाज युएईले आउदो जनवरी १० तारिख तमु च्यु ल्होसार भव्यता साथ मनाउदै
  • एनआरएनए कुवेतले इराकमा १४ वर्षदेखि अलपत्र परेकी एक नेपाली महिलाको उद्धार
  • नेपाल आदिवासी जनजाती महासंघ युएई द्वारा Learning & People Development तालिम सम्पन्न
  • काभ्रे कल्याणकारी कोष स्थापनार्थ बृहत सांस्कृतिक कार्यक्रम गर्दै
  • पछिल्ला सम्प्रेसणहरु

    तमु समाज युएईले आउदो जनवरी १० तारिख तमु च्यु ल्होसार भव्यता साथ मनाउदै

    अञ्जु थोकरको ‘सुन सुन साथी’ सार्वजनिक ( भिडियो सहित )

    एनआरएनए कुवेतले इराकमा १४ वर्षदेखि अलपत्र परेकी एक नेपाली महिलाको उद्धार

    बिजनेष

    जेष्ठ नागरिकलाई श्री एयरलाइन्सले ५ सयमा प्लेन चढाउने

    अन्तर्वार्ता

    हामीसंग फेसबुकमा जोड़िनुहोस